शिष्टमंडळाची आरबीआयकडे आग्रही मागणी पनवेल : राजेंद्र पाटील
कर्नाळा नागरी सहकारी बँकेतील ठेवीदारांना त्यांचे पैसे परत मिळवून देण्यासाठी ठेवीदार संघर्ष समितीच्या माध्यमातून जोरदार प्रयत्न व पाठपुरावा सुरु आहे, त्या अनुषंगाने शिष्टमंडळाने मंगळवारी (दि. २४) रिझर्व्ह बँक ऑफ इंडियाचे गव्हर्नर शक्तिकांत दास यांची मुंबईत भेट घेऊन चर्चा करून कर्नाळा बँकेने ठेवीदारांना पैसे परत करावेत, यासाठी आरबीआयने कर्नाळा बँकेला निर्देश द्यावेत, अशी आग्रही मागणी केली.
या शिष्टमंडळात खासदार गोपाळ शेट्टी, माजी खासदार किरीट सोमैय्या, विधान परिषदेतील विरोधी पक्षनेते प्रविण दरेकर, आमदार अतुल भातखळकर, ठेवीदार संघर्ष समितीचे अध्यक्ष आमदार महेश बालदी, आमदार अमित साटम, कुंडलिक काटकर यांचा समावेश होता. ठेवीदारांचे पैसे देण्यास कर्नाळा नागरी सहकारी बँक असमर्थ ठरल्याने ठेवीदार, खातेदार चिंतेत आहेत, त्यांना त्यांचे पैसे मिळवून देण्यासाठी ठेवीदार संघर्ष समिती सक्रीयपणे कार्यरत आहेत मात्र कर्नाळा बँकेचे अध्यक्ष व संचालक मंडळ झोपेचे सोंग घेऊन बिनधास्त उत्तरांची टोलवाटोलवी करत आहे. शेकडो ठेवीदारांनी आपल्या आयुष्याची पुंजी कर्नाळा बँकेत गुंतवली त्यामुळे ठेवीदारांना आपल्या कुटुंबाच्या आयुष्याची चिंता वाढू लागली आहे. तर दुसरीकडे अनेक क्लुप्त्या करून ठेवीदारांना वारंवार फसविण्याचे काम बँक करीत आहे. स्थानिक बँक म्हणून गोरगरिबांनी जागा जमीन विकून आपल्या कष्टाची आयुष्याची पुंजी कर्नाळा बँकेत जमा केली. परतावा म्हणून त्यांचे पैसे वेळेवर देणे क्रमप्राप्त होते मात्र बॅँकेतीलच मंडळींनी घोटाळा करून सर्वसामान्य माणसाचा पैसा हडप केला. त्यामुळे अत्यंत बिकट व संकटकालीन परिस्थिती ग्राहकांची झाली आहे. दहा लाख रुपये बँकेत असणाऱ्या ठेवीदारांना दहा खाती उघडण्याचे सांगत प्रत्येक खात्यावर एक लाख रुपये देण्याचे वेळमारु आश्वासन दिले जात आहे. नुसते पोकळ आश्वासन देण्यापेक्षा दिलेल्या मुदतीप्रमाणे बँकेने ठेवीदारांचे पैसे येत्या पंधरा दिवसात ठेवीदारांना परत करावेत, अशी मागणी शिष्टमंडळाने केली व आरबीआयने त्यांना तशा सूचना द्याव्यात. अशीही मागणी यावेळी करण्यात आली.
