ठाणे : ठाण्याला मोठे करण्याचे काम कै. आनंद दिघे यांच्यासह वसंत डावखरे यानी केले. डावखरे हे ठाण्याचे वैभव होते. त्यांच्या नावाशिवाय ठाण्याचे नाव पूर्ण होऊ शकत नाही, अशा शब्दांत पालकमंत्री एकनाथ शिंदे यांनी वसंतराव डावखरे यांना आदरांजली अर्पण केली.
ठाण्याच्या टीपटॉप प्लाझा येथे आयोजित करण्यात आलेल्या शोकसभेत ते बोलत होते. यावेळी पालकमंत्री एकनाथ शिंदे, माजी मंत्री गणेश नाईक, आ. जितेंद्र आव्हाड, काँग्रेसचे शहराध्यक्ष मनोज शिंदे, राष्ट्रवादी काँग्रेसचे ठाणे शहर अध्यक्ष आनंद परांजपे, माजी सनदी अधिकारी नंदकुमार जंत्रे, इक्बालसिंह चहल, माजी खा. संजीव नाईक, खा. श्रीकांत शिंदे, सभागृह नेते नरेश म्हस्के, विरोधी पक्ष नेते मिलिंद पाटील, भाजपचे शहराध्यक्ष संदीप लेले, आ. रवींद्र फाटक, सुभाष भोईर, माजी मंत्री गणेश नाईक, खा.कपिल पाटील, कृपाशंकर सिंग, सिडकोचे माजी अध्यक्ष प्रमोद हिंदुराव, अनंत तरे, जेष्ठ पत्रकार प्रकाश जोशी, सोपान बोंगाणे आदी उपस्थित होते.
माजी मंत्री तथा राष्ट्रवादी काँग्रेसचे नेते गणेश नाईक यांनी, हा आघात आपल्या सगळ्यांवर झाला आहे, विरोधी पक्षातील विरोधकांना त्यानी कधीच शत्रू समजले नाही. नाट्य, सिने, कवी लेखक, पत्रकार, राजकीय सर्वच क्षेत्रात ऋणानुबंध, सर्व समाजासोबतच कुटुंबाला संस्कार दिले, अशा शब्दांत आदरांजली अर्पण केली.
शेकापचे नेते जयंत पाटील म्हणाले की, ग्रामीण भागातून आलेली व्यक्ती ठाण्यातून महाराष्ट्राच्या राजकारणात आली. आणि त्या व्यक्तीने सबंध महाराष्ट्राला आपलेसे केले. विधान परिषदेच्या सभागृहात त्यांच्यामुळे चैतन्य पसरलेले असायचे. त्यांनी
सभागृहात घेतलेले निर्णय जनतेसाठी हितकारी ठरले आहेत. बाळासाहेब देसाईंच्या सान्निध्यात ते वाढले होते. त्यामुळेच त्यांचे चेंबर सर्व राजकीय पुढाऱ्यांचा अड्डा असायचा. आता त्यांची कमतरता पदोपदी जाणवेल.
आनंद परांजपे म्हणाले की, कोणत्याही पक्षाच्या कार्यकर्त्यांचे काम करून देणारा नेता म्हणून डावखरे यांची राज्याला ओळख आहे. ठाण्याची सांस्कृतिक ओळख त्यांनी आपल्या महापौर पदाच्या कारकिर्दीत दिली. राजकारणापालिकडे मैत्री जपण्याचा गुण फक्त वसंतराव डावखरे यांच्यातच होता.
नंदकुमार जंत्रे म्हणाले, 1982 मध्ये आमची ओळख झाली. ओळखीचे रूपांतर दाट मैत्रीत कधी झाले ते कळले नाही. ३५ वर्षे मैत्री टिकून राहिली. गल्ली पासून दिल्लीपर्यंत काम करून घेण्याची डावखरे यांच्यात हातोटी होती.
यावेळी संदीप लेले, मनोज शिंदे, चहा, कृपाशंकर सिंह, खा. कपिल पाटील यांनीही आदरांजली अर्पण केली.
