‘मॅगीबंदी’च्या श्रेयासाठी प्रशासकीय अधिकार्‍यांमध्ये वाद !

आग्रा : घराघरांत, मनामनांत आणि प्रत्येक पोटात स्थान मिळवणारी नेस्ले मॅगी आता देशातून हद्दपार होण्याची स्पष्ट चिन्हं असतानाच, या मॅगीबंदीचं श्रेय घेण्यावरून दोन अधिकार्‍यांमध्ये चांगलीच जुंपली आहे. मॅगीतील अपायकारक घटक उघडकीस आणण्यासाठी सगळी मेहनत मी केली आणि ’क्रेडीट’ मात्र माझा ‘बॉस’ घेतोय, असा आरोप अन्न निरीक्षक संजय सिंह यांनी केल्यानं उकळत्या मॅगीत वादाची फोडणीच पडली आहे.
दोन आठवड्यांपूर्वी उत्तर प्रदेशच्या काही भागांमध्ये ‘टू मिनिट मॅगी नूडल्स’च्या नमुन्यात अजिनोमोटो आणि शिशाचं प्रमाण अधिक आढळलं आणि मॅगीचे दिवसच फिरले. मॅगी तब्येतीसाठी हानिकारक असल्याची बातमी सर्व माध्यमांतून देशभर पसरली आणि एकेक करता-करता जवळपास सगळ्याच राज्यांनी मॅगीचं ‘पॅक-अप’ केलं. त्यामुळे शेवटी, मॅगीलाच भारतीय बाजारातून माघारीचा निर्णय घेणं भाग पडलं आहे.
मॅगीवरच्या या कारवाईबद्दल अन्न व औषध प्रशासन विभागाचं अभिनंदन होत असतानाच, या खात्यातील दोन अधिकारी आमनेसामने उभे ठाकले आहेत. संजय सिंह आणि व्ही के पांडे यांच्यात श्रेयासाठी वाक् युद्ध सुरू झालंय. ‘श्रेय माझेच आहे’, असा दावा हे दोघंही करताहेत.
नेस्ले इंडियाच्या टू-मिनिट नुडल्सविरोधात जी कारवाई सुरू आहे, ते प्रकरण मीच उघडकीस आणलं, असं संजय सिंह यांनी सांगितलं. अन्न तपासणीचं दैनंदिन काम करत असताना, अब्जावधी रुपयांची उलाढाल करणार्‍या कंपनीला आपण गाशा गुंडाळायला लावू शकू, अशी कल्पनाही कधी केली नव्हती, असंही त्यांनी नमूद केलं. गेले वर्षभर आपण या मोहिमेवर काम करतोय. बाराबंकीच्या बाजारातून 10 मार्च 2014 रोजी मी नमुने गोळा केले. ते गोरखपूर लॅबकडे पाठवले. तेव्हा त्यात शिसं आणि मोनोसोडियम ग्लुटामेटचं प्रमाण जास्त असल्याचा अहवाल आला. त्यानंतर आपण मॅगीशी संपर्क साधला. त्यांच्या मागणीनुसार, कोलकात्याच्या प्रयोगशाळेकडे मॅगी नुडल्सचे नमुने पाठवले. तिथेही तेच निष्पन्न झाल्यानंतर आम्ही मॅगीविरोधात खटला दाखल केल्याचं त्यांनी स्पष्ट केलं.
परंतु, बाराबंकी इथल्या अन्न सुरक्षा विभागात वरिष्ठ अधिकारी असलेले पांडे यांनी सिंह यांचा दावा खोडून काढलाय. प्रशासनात प्रत्येक पदासाठी विशिष्ट काम नेमून दिलेलं असतं. संजयने नमुने गोळा केले आणि ते प्रयोगशाळेकडे पाठवले, हे खरं आहे. पण, तिथून अहवाल आल्यानंतर मी ठोस पावलं उचलल्यामुळेच मॅगीबंदी शक्य झाली आहे, असं त्यांचं म्हणणं आहे. या भांडणाची एफडीएमध्ये चमचमीत चर्चा सुरू असून सीनिअर विरुद्ध ज्युनिअर असा सामना तिथे रंगला आहे.