स्वयंम न्युज ब्युरो : Navimumbailive.com@gmail.com – ८३६९९२४६४६
नवी मुंबई : शिव छाया मित्र मंडळ तुर्भे आणि सानपाडा येथील सानपाड्याचा राजा सार्वजनिक गणेश उत्सव मंडळ, सानपाडा येथे महाआरतीसाठी पद्मभूषण, श्रेष्ठ गायक शंकर महादेवन व शिवसेना उपनेते विजय नाहटा यांनी उपस्थित राहून महाआरती केली आणि सर्वांना गणेशोत्सवाच्या शुभेच्छा दिल्या. शंकर महादेवन व विजय नाहटा हे महाआरतीसाठी उपस्थित झाल्याने तुर्भे आणि सानपाडा गणेश उत्सव मंडळात भक्तीचे आणि उत्साहाचे वातावरण निर्माण झाले होते.
तुर्भे येथील शिवछाया मित्र मंडळाची गणेशोत्सवाची गेली ५४ वर्षे अविरत परंपरा जेष्ठ समाजसेवक, पत्रकार अंकुश वैती यांच्या कुशल नेतृत्वात सुरु आहे. बुधवारी जेष्ठ लोकप्रिय गायक, पद्मभूषण नवी मुंबईकर गायक शंकर महादेवन यांच्यासह शिवसेना उपनेते विजय नाहटा यांनी शिवछाया मित्र मंडळाच्या नवी मुंबईचा राजा या नवसाला पावणाऱ्या गणरायास भेट देऊन बाप्पांचरणी नतमस्तक होत बाप्पांची महाआरती केली. यावेळी भाविक भक्तांनी संपूर्ण परिसर गर्दीने फुलून गेला होता. गणपती बाप्पाच्या जयघोषाने आसमंत दुमदुमून गेला होता. सानपाडा सेक्टर आठ येथील सानपाड्याचा राजा सार्वजनिक गणेश उत्सव मंडळास शंकर महादेवन आणि उपनेते विजय नाहटा यांनी भेट देऊन महाआरती केली. यावेळी शंकर महादेवन यांनी गणपती बाप्पाची संगीतमय आरती गाऊन उपस्थित भक्तांना मंत्रमुग्ध केले. यावेळी शिवछाया मित्र मंडळाचे अध्यक्ष अंकुश वैती आणि सानपाड्याचा राजा सार्वजनिक गणेश उत्सव मंडळाचे अध्यक्ष शिवाजी ढमाले आणि सचिव बाबाजी इंदोरे यांनी शंकर महादेवन आणि विजय नाहटा यांचे आभार व्यक्त केले. यावेळी शिवसेनेचे पदाधिकारी आणि गणेश भक्त मोठ्या संख्येने उपस्थित होते.
