मुंबई : लोकसभेच्या निवडणुकाजवळ येतील तसतसे राजकीय वातावरणही चांगलेच तापत आहे. यातच भाजपाचे मुंबई अध्यक्ष आशीष शेलार आणि मनसेमध्ये ट्विटरवर चांगलेच शाब्दिक युद्ध रंगलेले बघायला मिळत आहे. आशीष शेलार यांनी मनसेला डिवचण्यासाठी पुन्हा एकदा ट्विट केले आहे.
दोन दिवसांपूर्वी दादरमधील शिवाजी पार्क परिसरात पहाटे मॉर्निंग वॉकसाठी आलेल्या नागरिकांसोबत काँग्रेसचे उमेदवार एकनाथ गायकवाड संवाद साधण्यासाठी आले होते. यावेळी एकनाथ गायकवाड यांचा प्रचार सुरू असताना त्यांच्यासोबत मनसेचे सरचिटणीस संदीप देशपांडे मनसैनिकांसह सहभागी झाले. यावरुन आशीष शेलार यांनी शिवाजी पार्कात एक शून्य दुसऱ्या शुन्याला भेटला असे सांगत मनसेवर निशाणा साधला आहे. त्यांनी ट्विटवरुन पुन्हा मनसेला डिवचण्याचा प्रयत्न केला आहे.
आशिष शेलार ट्विटमध्ये म्हणाले,
गळ्यात गळे घालून प्रचार करू लागला..
पण उपयोग काय?
शुन्याचा शुन्या बरोबर गुणाकार केला काय, किवा बेरीज केली काय,
बाकी शुन्यच !
नाही आले “एकनाथराव” भेटीला
तरी फळे आली शिवाजी पार्कच्या बोरीला?’
त्यावर मनसेने मोदीमित्रांची चैन झाली भारतीयांच्या कष्टावर…
चेंडूफळीचा खेळ तुमचा, बारामतीच्या उष्ट्यावर…
त्रिफळा उडवू मोदी-शहांचा, गोलाकार खेळाडू तुमचे थकतील…
काळजी करू नका शेलार भाऊ,
बारावा गडी म्हणून तुम्हालाच साद घालतील…
