मुंबई : सह्याद्री अतिथी गृहावर झालेल्या रस्ते सुरक्षा परिषदेदरम्यान राज्यातल्या रस्ते अपघातांचा आढावा घेतला. राज्यातील ६६ टक्के अपघाती मृत्यू हे मोटारसायकल, सायकल आणि पादचाऱ्यांच्या अपघातातील आहेत. अपघाती मृत्युंच्या संख्येत देशात महाराष्ट्र तिसऱ्या क्रमांकावर असल्याचे समोर आले आहे. २०१३ च्या तुलनेत मागील वर्षी राज्यातील अपघातांची संख्या ही १०.५ टक्क्यांनी कमी झाल्याचे अधिकाऱ्यांनी सांगितले.
बैठकीत नुकत्याच झालेल्या आंबेनळी घाटातल्या अपघाताबाबतही चर्चा झाली. राज्यातील घाटांमधील वाढते अपघात रोखण्यासंदर्भात उपाययोजना सुचविण्यासाठी एका तज्ज्ञ समितीची स्थापना करण्याचा निर्णय राज्य रस्ते सुरक्षा परिषदेच्या आज झालेल्या बैठकीत घेण्यात आला. समितीमध्ये संबंधित विविध विभागांचे वरिष्ठ अधिकारी, रस्ता संरक्षणातील तज्ज्ञ आदींचा समावेश करण्यात यावा आणि समितीने सहा महिन्यात शासनास अहवाल सादर करावा, अशा सूचना परिवहन मंत्री दिवाकर रावते यांनी दिल्या.
राज्यातल्या रस्ते अपघातांचाही आढावा घेण्यात आला. राज्यात महामार्गांची संख्या १५ टक्के असली तरी महामार्गांवरील अपघातांची संख्या मात्र ५७ टक्के इतकी आहे. इतर मार्गांवरील अपघातांची संख्या ही ३३ टक्के इतकी आहे, अशी माहिती दिली. रावते म्हणाले की, रस्त्यांचा दर्जा सुधारला की त्यावर चालणाऱ्या वाहनांचा वेग वाढतो. महामार्गांवरील रस्ते अपघातामध्ये वाहनांचा अतिवेग हे एक प्रमुख कारण ठरत आहे. हे रोखण्यासाठी परिवहन, सार्वजनिक बांधकाम, वाहतूक पोलीस आदींनी एकत्र येऊन समन्वयाने काम करावे.
परिवहन विभागाचे प्रधान सचिव आशिषकुमार सिंह, परिवहन आयुक्त शेखर चन्ने, माहिती आणि जनसंपर्क महासंचालनालयाचे सचिव ब्रिजेश सिंह, मुंबई वाहतूक पोलीस उपायुक्त दिपाली मासिरकर, समृद्धी महामार्गाचे मुख्य अभियंता अनिल गायकवाड, वेस्टर्न इंडिया ऑटोमोबाईल असोसिएशनचे अध्यक्ष नितीन डोसा यांच्यासह सार्वजनिक बांधकाम, संबंधित विभागांचे अधिकारी आदी उपस्थित होते.
