नवी मुंबई : ठाणे-वाशी ट्रान्सहार्बर मार्गावरील रविवारी ऐरोली येथे सकाळच्या सुमारास ओव्हरहेड वायर तुटल्याने लोकल सेवा पूर्णपणे ठप्प झाली होती. त्यामुळे घराबाहेर पडलेल्या शेकडो प्रवाशांचे रविवारी सुट्टीच्या दिवशी हाल झाले.ऐरोली येथे सकाळी पावणे अकराच्या सुमारास ओव्हरहेड वायर तुटली. यामुळे वाशीकडे जाणारी लोकल सेवा पूर्णपणे ठप्प झाली. परिणामत: सुट्टीच्या दिवशी कुटूंबासोबत घराबाहेर पडलेल्या प्रवाशांचे हाल झाले. ट्रान्सहार्बर मार्गावरील ऐरोली, रबाले, घणसोली,तुर्भे आदी स्थानकांवर प्रवाशी अडकून पडले होते. प्रशासनाकडून तातडीने ओव्हरहेड वायरच्या दुरूस्तीचे काम हाती घेण्यात आले होते. तब्बल तीन तासानंतर ओव्हर हेड वायरचे काम संपल्यावर रेल्वे सेवा सुरळीतपणे सुरू झाली.
