युवा नेते आमदार नितेश राणे यांनी केले विजयी उमेदवारांचे अभिनंदन

** लीलावती रुग्णालय क्रेडीट सोसायटी निवडणूक २०१५ **
मुंबई : वांद्रे येथील प्रख्यात लीलावती हॉस्पिटलच्या क्रेडीट सोसायटी निवडणुकीत स्वाभिमान संघटनेचे अध्यक्ष आमदार नितेश राणे यांच्या ‘महाराष्ट्र समर्थ कामगार संघटने’च्या ‘स्वाभिमान समर्थ पॅनेल’ने १३ पैकी १० जागा जिंकत प्रतिस्पर्धी शिवसेना-मनसे युनियनला धोबीपछाड देत घवघवीत यश मिळवले. या भव्य विजयानंतर शनिवारी आमदार नितेश राणे यांनी लीलावती रुग्णालयात भेट देऊन विजयी उमेदवारांचे अभिनंदन केले.
या वेळी कर्मचार्‍यांना उद्देशून केलेल्या भाषणात ‘आपल्यावर विश्वास दाखवल्याबद्दल कृतज्ञता व्यक्त करून तुम्ही दाखवलेल्या विश्वासाला तडा जाऊ देणार नाही तसेच तुमचे प्रलंबित प्रश्‍न सोडवण्यासाठी रुग्णालय व्यवस्थापनाशी पाठपुरावा करू आणि कर्मचार्‍यांच्या उज्ज्वल भविष्यासाठी कटिबद्ध राहू असा विश्‍वास आमदार नितेश राणे यांनी कर्मचार्‍यांना दिला.’ याप्रसंगी रुग्णालयातील कर्मचारी वर्ग व युनियनच्या पदाधिकार्र्‍यांनी युवा नेते आमदार नितेश राणे यांचे पुष्पगुच्छ देऊन स्वागत केले. याप्रसंगी महाराष्ट्र समर्थ कामगार संघटनेचे सरचिटणीस प्रवीण नलावडे, उपाध्यक्ष संदीप राणे, चिटणीस विश्वनाथ दळवी, लीलावती रुग्णालय युनिट अध्यक्ष सुरेश पवार आदी पदाधिकारी उपस्थित होते.