नवी मुंबई: अज्ञात चोरट्याने तुर्भे एमआयडीसीतील एव्हरेस्टर निवाससमोर उभ्या असलेल्या स्कुटीचे लॉक तोडून स्कुटीच्या डिकीमध्ये ठेवलेली २ लाख १८ हजार रुपयांची रोख रक्कम चोरुन नेल्याची घटना घडली. तुर्भे एमआयडीसी पोलिसांनी याप्रकरणी अज्ञात चोरट्याविरोधात गुन्हा दाखल करुन त्याचा शोध सुरु केला आहे.
या प्रकरणातील तक्रारदार सुमित पांडे तळोजा फेज-२ मध्ये रहावयास असून २५ ऑक्टोबर रोजी दुपारी पावणे बारा वाजण्याच्या सुमातास तुर्भे एमआयडीसीतील एव्हरेस्ट निवास इमारतीत कामानिमित्त आला होता. यावेळी त्याने आपल्याजवळची २ लाख १८ हजार रुपयांची रोख रक्कम स्कुटीच्या सिट खालील डिकीमध्ये ठेवल्यानंतर तो एव्हरेस्ट इमारतीत गेला होता. हीच संधी साधून अज्ञात चोरट्याने सुमित पांडे याच्या स्कुटीचे लॉक तोडून डिकीमध्ये ठेवलेली २ लाख १८ हजार रुपयांची रोख रक्कम चोरुन नेली.
दरम्यान, दोन तासानंतर सुमित आपल्या स्कुटीजवळ आल्यानंतर स्कुटीमध्ये ठेवलेली रक्कम चोरीला गेल्याचे त्याच्या निदर्शनास आले. त्यामुळे त्याने तुर्भे एमआयडीस पोलीस ठाण्यात तक्रार दाखल केली. त्यानुसार पोलिसांनी अज्ञात चोरट्याविरोधात गुन्हा दाखल करुन याप्रकरणाचा तपास सुरु केला आहे.
स्कूटीचे लॉक तोडून २ लाख १८ हजाराची चोरी
