आगीमध्ये इम्पीलियर पेंट अ‍ॅन्ड केमिकल कंपनी जळून खाक

* कंपनी पूर्णपणे जळून खाक
* अडीच तासानंतर आग आली आटोक्यात
ऐरोली / वार्ताहर
रबाले एमआयडीसीतील इम्पीलियर पेंट अ‍ॅन्ड केमिकल या कंपनीला 13 ऑक्टोबर रोजी रात्री 10.30 वाजण्याच्या सुमारास आग लागून सदर कंपनी पूर्णपणे जळून खाक झाल्याची घटना घडली.
रबाले एमआयडीसीतील साई प्रसाद हॉटेलजवळ इम्पीलियर पेन्ट अ‍ॅन्ड केमिकल कंपनी असून या कंपनीमध्ये पेन्ट तयार केले जात होते. याच कंपनीमध्ये असलेल्या केमिकलने 13 ऑक्टोबर रोजी रात्री 10.30 वाजण्याच्या सुमारास पेट घेतला. कंपनीमध्ये मोठ्या प्रमाणात केमिकल्सचे ड्रम होते. आगीमुळे केमिकल्सच्या ड्रमचे स्फोट झाल्याने आग संपूर्ण कंपनीला लागली. केमिकलमुळे कंपनीतील आग वाढतच असल्याने ऐरोली, वाशी, सीबीडी, नेरुळ आणि ठाणे आदि भागातील अग्निशमन दलाला देखील सदर ठिकाणी पाचारण करण्यात आले. त्यानंतर अग्निशमन दलाच्या जवानांनी घटनास्थळी दाखल होऊन तब्बल अडीच तासाच्या प्रयत्नानंतर सदर कंपनीला लागलेली आग आटोक्यात आणली.
अग्निशमन दलाच्या जवानांनी तब्बल अडीच तासाच्या प्रयत्नानंतर येथील आग आटोक्यात आणली. या आगीत कुठल्याही प्रकारची जीवितहानी झाली नसली तरी आगीमुळे कंपनी पूर्णपणे जळून खाक झाली आहे. त्यामुळे कंपनीचे मोठ्या प्रमाणात नुकसान झाले आहे. दरम्यान, या कंपनीला लागलेल्या आगीचे कारण स्पष्ट झाले नसल्याचे अग्निशमन दलाच्या सुत्रांनी सांगितले.
या कंपनीला लागलेल्या आगीत कुठल्याही प्रकारची जीवितहानी झाली नसली तरी आगीमुळे संपूर्ण कंपनी जळून खाक झाल्याने कंपनीचे मोठ्या प्रमाणात नुकसान झाले आहे.