शिखापूर : वारंवार परदेश दौर्‍यांवर जाणारे पंतप्रधान नरेंद्र मोदी तेथे गेल्यावर सादरीकरण आणि आपल्या कपडयांची जास्त काळजी घेतात.
शेतकरी, गरीबांपेक्षा त्यांना आपल्या कपडयांची जास्त काळजी आहे अशा शब्दात काँग्रेस उपाध्यक्ष राहुल गांधी यांनी पंतप्रधान नरेंद्र मोदींवर हल्लाबोल केला आहे.
बिहारच्या शिखापूरमध्ये बुधवारी निवडणूक प्रचारसभेला संबोधित करताना त्यांनी पंतप्रधान मोदींचा समाचार घेतला.
मोदीजी अमेरिकेत गेले तेव्हा त्यांनी तेथे 16 वेळा कपडे बदलले. कधी पिवळा, हिरवा, निळा, गुलाबी अशा रंगाचे कपडे ते बदलत होते. तुम्ही नितीशजींना सफेद रंगाशिवाय अन्य कुठल्या रंगाच्या कपडयात बिघतले आहे का ? असा सवाल त्यांनी केला.
मोदींच्या अमेरिका दौर्‍यातील छायाचित्रांवरही त्यांनी टीका केली. शेतकर्‍यांपेक्षा उद्योगपती त्यांना जास्त जवळचे आहेत. मोदींच्या छायाचित्रांमध्ये फेसबुक, इंस्टाग्राम, गुगल, युटूबमधील माणसे त्यांच्यासोबत दिसतील पण शेतकरी, भारतीय कामगार किंवा गरीब भारतीय यांच्यासोबत छायाचित्रांमध्ये मोदी दिसणार नाहीत असे राहुल म्हणाले.
बिहारमध्ये काँग्रेस, संयुक्त जनता दल आणि राष्ट्रीय जनता दल या तीन पक्षांनी एकत्र येऊन धर्मनिरपेक्ष पक्षांची महाआघाडी स्थापन केली आहे.
मोदींनी अमेरिकेत 16 वेळा कपडे बदलले – राहुल गांधी
