पुणे : पुण्यात वडगाव- धायरी पुलावर भीषण अपघात झाल्याने त्यात 6 जण जागीच ठार झालेत. डंपरने मारूती व्हॅनला दिलेल्या धडकेत हा अपघात झाला आहे. अपघातातील मृतांची संख्या वाढण्याची भीती आहे. तर अपघातानंतर डंपर चालक फरार झाला आहे.
राष्ट्रीय महामार्ग क्रमांक 4 वरुन एक डंपर मुंबईच्या दिशेने निघाला होता. वडगावला सकाळी आठ वाजेच्या सुमारास या डंपरने एका मारूती व्हॅनसह चार दुचाकींना धडक दिली. यासह एक बस दोन दुचाकींना धडक देत हा डंपर पुलावरून खाली पडला. यामुळे आणखी दोन चारचाकी गाड्यांचं नुकसान झालं. या घटनेत प्राथमिक माहितीनुसार 6 जण ठार झाले. मृतांची माहिती अजून मिळालेली नाही. डंपरचा ब्रेक फेल झाल्याने हा अपघात झाल्याचं सांगितलं जातंय.
अपघातामुळे पुलाच्या दोन्ही बाजूने ट्रॅफिक जॅम झालं होतं. पोलिसांनी क्रेनच्या मदतीने गाड्या बाजूला केल्या. आणि काही वेळेनंतर वाहतूक हळुहळु सुरू झाली. पण डंपरच्या फरार चालकाची माहिती अद्याप हाती आलेली नाही. तसंच डंपर कोणाच्या मालकीचा आहे हेही कळलेलं नाही. पोलिस याप्रकरणी तपास करत आहे.
पुण्यात वडगाव पुलावर भीषण अपघात, 6 जण जागीच ठार
