महापालिकेच्या सार्वजनिक वाचनालयाच्या दुरावस्थेबाबत भाजपची तक्रार

नवी मुंबई : नेरुळ सेक्टर दोन येथील हरि ओम शॉपिंग सेंटरच्या कोपर्‍यावर असणार्‍या महापालिकेच्या सार्वजनिक वाचनालयाची दुरावस्था झालेली असून महापालिका प्रशासनाचा तिकडे कानाडोळा आहे. स्थानिक रहीवाशांना या वाचनालयाचा उपयोग न होता त्रास सहन करावा लागत असल्याचे सांगत भाजपचे प्रभाग ८४ चे वॉर्ड अध्यक्ष विलास चव्हाण यांनी सार्वजनिक वाचनालयाची लवकरात लवकर डागडूजी करावी अशी लेखी मागणी नेरूळ महापालिका विभाग अधिकार्‍यांकडे केली आहे.
२००५ साली नवी मुंबई महापालिकेच्या माध्यमातून या सार्वजनिक वाचनालयाची निर्मिती केली. स्वच्छ सर्वेक्षण २०१८च्या माध्यमातून सर्व नवी मुंबई शहराची रंगरंगोटी महापालिका प्रशासनाने केली असताना पालिकेच्या या सार्वजनिक वाचनालयाची डागडूजी व रंगरंगोटी करण्यास महापालिका प्रशासनाने उदासिनता दाखविली असल्याचा संताप भाजपच्या विलास चव्हाण यांनी निवेदनातून व्यक्त केला आहे.
मागील तीन ते चार वर्षापासून या वाचनालयात एकही वर्तमानपत्र आलेले नाही. त्या ठिकाणी असलेली आसनव्यवस्था अपुरी असल्याने ज्येष्ठ नागरीकांना या वाचनालयाचा वापर करताही येत नाही. संध्याकाळच्या वेळी या वाचनालयाचा वापर अनधिकृत फेरीवाले करत असतात. पालिकेचे वाचनालयाचा सध्या फेरीवाल्यांकडून वापर केला जात आहे. या वाचनालयाची लवकरात लवकर रंगरंगोटी करून ज्येष्ठ नागरिकांसाठी आसनव्यवस्था वाढविण्याची मागणी भाजपच्या विलास चव्हाण यांनी महापालिका प्रशासनाकडे केली आहे.