नवी मुंबई / साईनाथ भोईर
मुख्यमंत्री देवेंद्र फडणवीस यांनी रविवारी नवी मुंबईतील एका कार्यक्रमानिमित्त आल्यावर सिडको व अन्य अधिकार्‍यांची भेट घेत नवी मुंबईतील सर्व जमिन ‘फ्री होल्ड’ करण्याचा निर्णय घेतला असला तरी या निर्णयाच्या अंमलबजावणीस विलंब लागणार असल्याचे स्पष्ट झाले आहे. ‘फ्री होल्ड’च्या निर्णयामध्ये गावठाणांचा तसेच कुकशेत गावाचा समावेश नसल्याने मुख्यमंत्र्यांचा हा निर्णय केवळ सिडको निर्मित गृहनिर्माण सोसायट्या आणि साडे बारा टक्के भुखंडावरील गृहनिर्माण सोसायट्यांपुरताच सिमित असल्याचे स्पष्ट झाले आहे.
मुख्यमंत्र्यांनी घेतलेल्या निर्णयाबाबत भाजपाच्या बेलापुर मतदारसंघातील आमदार मंदा म्हात्रे यांनी पत्रकार परिषदेमध्ये निर्णय जाहिर केला. या निर्णयाबाबत सिडको मुख्यालयात चौकशी केली असता, मुख्यमंत्र्यांनी केलेली घोषणा स्तुत्य असली तरी ‘फ्री होल्ड’बाबतचा ठराव सिडकोच्या संचालक कार्यकारिणी मंडळामध्ये संमत करून तो मंजुरीसाठी मंत्रालयात पाठवावा लागणार असल्याचे स्पष्ट केले. हा ‘फ्री होल्ड’चा निर्णय केवळ सिडको निर्मित इमारती आणि साडे बारा टक्केच्या भुखंडावर बांधण्यात आलेल्या इमारती यापुरताच सिमित असल्याचे सिडको अधिकार्‍यांकडून स्पष्ट करण्यात आले आहे.
‘फ्री होल्ड’च्या निर्णयामध्ये नवी मुंबईतील गावठाणाचा व कुकशेत गावाचा समावेश नसल्याने ग्रामस्थांमध्ये मुख्यमंत्र्यांच्या निर्णयाचे स्वागत झाले नाही. मुख्यमंत्री लवकरच गावठाणाचाही प्रश्‍न निकाली लावतील असा आशावादही यावेळी ग्रामस्थांकडून व्यक्त करण्यात आला. नवी मुंबईतील गावठाणांचे अद्यापि सिडकोकडून सिमाकंनच झाले नसल्याने गावठाणाला तुर्तास ‘फ्री होल्ड’च्या निर्णयाचा फायदा होणार नाही. लवकरच सिडकोकडून गावठाणांच्या सिमाकंनाबाबत सर्व्हेला सुरूवात होणार असून त्यानंतरच गावठाणालाही ‘फ्री होल्ड’च्या निर्णयाचा फायदा मिळणार असल्याची माहिती सिडको अधिकार्‍यांकडून यावेळी देण्यात आली.
इतर गावाची परिस्थिती व कुकशेतची परिस्थिती वेगळी आहे. कुकशेत गावाचा मालकी हक्क एमआयडीसीकडे आहे. कुकशेत गाव ‘फ्री होल्ड’ केल्यानंतर त्याची माहिती सर्वप्रथम एमआयडीसीला देण्यात येईल. त्यानंतर त्या जमिनीचा निर्णय घेण्याचा अधिकार एमआयडीसीचा राहणार असल्याचे यावेळी सिडको अधिकार्‍यांकडून स्पष्ट करण्यात आले. सिडकोकडून सुरूवातील सिडकोने बांधलेल्या गृहनिर्माण सोसायट्यांबाबतच ‘फ्री होल्ड’चा निर्णय घेण्याचे निश्‍चित केले होते, परंतु स्वत: मुख्यमंत्र्यांनीच घोषणा केल्यामुळे आता साडे बारा टक्के भुखंडावरील सोसायट्यांनाही त्यांचा फायदा होणार असल्याची माहिती सिडकोतील अधिकार्‍यांकडून देण्यात येत आहे.
नवी मुंबईत भाजपाचा एकच आमदार असला तरी मोदी लाटेमुळे अवघ्या 1200 निसटत्या मतांनी भाजपाला बेलापुरमध्ये विजय मिळाला आहे. त्यानंतर झालेल्या महापालिका निवडणूकीत भाजपाचे संख्याबळ 6वर अडकले. त्यामुळे या ‘फ्री होल्ड’च्या निर्णयामुळे नवी मुंबईत भाजपाचा जनाधार वाढण्यास मदतच होणार असल्याचा आशावाद भाजपाच्या पदाधिकार्‍यांकडून व कार्यकर्त्यांकडून व्यक्त करण्यात येत आहे.
