नवी मुंबई महापौर चषक बुध्दीबळ व कॅरम स्पर्धा ३० व ३१ जानेवारी रोजी आयोजन

नवी मुंबई / दीपक देशमुख
नवी मुंबई महानगरपालिकेच्या क्रीडा व सांस्कृतिक कार्यक्रम समितीच्या वतीने महापालिका क्षेत्रातील क्रीडापटूंना उत्तेजन मिळावे याकरीता विविध प्रकारच्या क्रीडा स्पर्धांचे आयोजन करण्यात येत असून मागील वर्षीप्रमाणेच याही वर्षी दि. ३० व ३१ जानेवारी २०१६ रोजी नवी मुंबई महापौर चषक बुध्दीबळ व कॅरम स्पर्धा अँकरवाला एज्युकेशन कॅडमी, मर्चंड जिमखाना शेजारी, सेक्टर १४, वाशी, नवी मुंबई येथे संपन्न होत आहे.
सदरची स्पर्धा दि. ९ व १० जानेवारी रोजी आयोजित करण्याचे जाहिर करण्यात आले होते तथापि काही अपरिहार्य तांत्रिक कारणास्तव ही स्पर्धा ३० व ३१ जानेवारी २०१६ रोजी आयोजित करण्यात येत आहे. बुध्दीबळ स्पर्धेमध्ये विविध गटात ९, १३, १५ वर्ष वयोगटातील मुले व मुली तसेच खुल्या गटात नवी मुंबई महानगरपालिका क्षेत्रासह ठाणे जिल्हा व मुंबई जिल्ह्यातील पुरुष व महिला सहभागी होऊ शकतात. कॅरम स्पर्धेमध्ये नवी मुंबई महानगरपालिका क्षेत्रातील रहिवाशांकरीता पुरुष व महिला खुला गट असणार आहे.
स्पर्धा सहभागाकरीता विहीत नमुन्यात प्रवेश अर्ज भारतरत्न स्व. राजीव गांधी क्रीडा संकुल, सेक्टर ३, सी.बी.डी., बेलापूर, तसेच विष्णुदास भावे नाट्यगृह, वाशी बसडेपो समोर उपलब्ध आहे. स्पर्धा प्रवेश अर्ज दि. २२ जानेवारी २०१६ पर्यंत सादर करावयाचे असून अर्जासोबत निवासी पुरावा म्हणून आधारकार्ड, वाहनचालक परवाना, निवडणूक ओळखपत्र, पासपोर्ट यापैकी कोणताही एक पुरावा सादर करण्यात यावा. रेशनकार्ड, नोंदणीकृत भाडे करारनामा (रजिस्टर्ड रुम ग्रीमेंट) यासोबत कोणतेही एक फोटो ओळखपत्र असणे बंधनकारक राहील.
तरी नवी मुंबई महानगरपालिका क्षेत्रातील बुध्दीबळ खेळाडू व कॅरम खेळाडूंनी या स्पर्धेमध्ये मोठ्या प्रमाणावर सहभागी होऊन हा स्पर्धा उपक्रम यशस्वी करावा असे आवाहन करण्यात येत आहे.