क्रॉफर्ड मार्केटच्या आगीत अनेक दुकान जळून खाक

मुंबई : दक्षिण मुंबईतील प्रसिध्द क्रॉफर्ड मार्केटमधील फळ बाजाराला लागलेल्या भीषण आगीवर अग्निशमन दलाने नियंत्रण मिळवले आहे.
रविवारी पहाटेच्या सुमारास येथील फळबाजारामध्ये भीषण आग भडकली होती. 60 पेक्षा जास्त दुकानांचे या आगीमध्ये नुकसान झाले आहे. या आगीमध्ये कोणतीही जिवीतहानी झाली नसल्याची माहिती अग्निशमन अधिकार्‍याने दिली.
पहाटे पाच वाजून 23 मिनिटांनी आमच्या नियंत्रण कक्षाला आगीची माहिती मिळाली. आम्ही लगेचच 10 बंब गाडया आणि आठ पाण्याचे टॅकर घटनास्थळी पाठवून दिले आणि आग विझवण्याचे प्रयत्न सुरु केले अशी माहिती अग्निशमन दलाच्या अधिकार्‍याने दिली.
आगीवर आता नियंत्रण मिळवले असून आग पूर्णपणे विझवण्याचे प्रयत्न सुरु आहेत. आगीमध्ये सुवासिक अत्तरे आणि पॅकिंग साहित्याच्या दुकानांचे सर्वाधिक नुकसान झाले. आगीचे नेमके कारण अद्याप स्पष्ट झालेले नाही.
महापालिका आयुक्त अजॉय मेहता यांनी घटनास्थळी जाऊन पाहणी केली. क्रॉफर्ड मार्केट परिसर अत्यंत वर्दळीचा भाग असून, येथे दुकाने दाटीवाटीने खेटून उभी आहेत.