Home Uncategorized

0 94

स्वयंम पीआर एजंन्सी : ८३६९९२४६४६ – ९८२००९६५७३

मुंबई : राष्ट्रसंत तुकडोजी महाराजांच्या विचारांना मानणारा मोठा वर्ग हा फक्त मोझरी परिसरातच नव्हे तर संपूर्ण देशभरात आहे. त्यांच्या विचारांचा वारसा घेऊन आपण वाटचाल करू. महाराष्ट्रात २०२४ च्या विधानसभा निवडणुकीत काँग्रेस सर्वात मोठा पक्ष म्हणून सत्तेत येईल आणि राष्ट्रसंत तुकडोजी महाराज यांच्या ग्रामगीतेचा आधार घेऊनच ते सरकार काम करेल, असा मानस महाराष्ट्र प्रदेश काँग्रेस कमिटीचे अध्यक्ष नाना पटोले यांनी व्यक्त केला आहे.

काँग्रेस प्रदेशाध्यक्ष नाना पटोले हे विदर्भ दौऱ्यावर असून आज अमरावती जिल्ह्यातील तिवसा येथे त्यांनी काँग्रेस  कार्यकर्त्यांशी संवाद साधला.

यावेळी बोलताना पटोले पुढे म्हणाले की, विदर्भाच्या दौऱ्यात आपण कष्टकरी, कामकरी, शेतकरी, गरिबांच्या व्यथा पाहिल्या आहेत. कोरोनामुळे या लोकांचे जगणे अवघड झाले आहे. एकीकडे कोरोनाशी सामना तर दुसरीकडे जगण्याची धडपड सुरु आहे. केंद्रातील मोदी सरकारने लोकांना जाणीवपूर्वक मरणाच्या दारात आणून ठेवले आहे. ऑक्सीजन, रेमडेसीवर या औषधांचा पुरवठा केंद्र सरकार करते तो वेळेवर व पुरेसा न केल्यामुळे हजारो लोकांचे जीव गेले. आताही बुरशी आजारावरचे इंजेक्शन केंद्राकडून वेळेवर व पुरेशा प्रमाणात मिळत नाही. शेतकरी सहा महिन्यापासून आंदोलन करत आहेत पण पंतप्रधान मोदींना या शेतकऱ्यांशी बोलावयास वेळ नाही. भाजपचे सरकार देशाला अधोगतीकडे घेऊन गेले आहे. काँग्रेसचा विचारच या देशाला वाचवू शकतो, संविधानाला वाचवू शकतो असेही ते म्हणाले.

या कार्यक्रमाला महिला व बालकल्याण मंत्री व अमरावतीच्या पालक मंत्री यशोमती ठाकूर, प्रदेश कार्याध्यक्ष आ. कुणाल पाटील, आमदार बळवंत वानखेडे, माजी आमदार विरेंद्र जगताप, जिल्हा परिषदेचे अध्यक्ष व अमरावती जिल्हा काँग्रेस कमिटीचे अध्यक्ष अनिरुद्ध उर्फ बबलू देशमुख, प्रदेश प्रवक्ते अतुल लोंढे यांच्यासह काँग्रेस पदाधिकारी व कार्यकर्ते उपस्थित होते.

युवक काँग्रेसमार्फत सिव्हील हॉस्पिटल, अमरावती येथे मागील ४५ दिवसांपासून रुग्णांच्या नातेवाईकांना जेवण तसेच गरजूंना विविध आरोग्यसेवा निस्वार्थपणे पुरवण्यात येत आहेत. प्रदेशाध्यक्ष नाना पटोले यांनी आज भेट देऊन युवक काँग्रेसच्या या चमूचे कौतुक केले.  अपंग जीवन विकास संस्था अमरावती द्वारा संचालित जिल्हा अपंग पुनर्वसन केंद्राद्वारे गरजु दिव्यांग बांधवांना किराणा साहित्याचे वितरण प्रदेशाध्यक्ष नाना पटोले यांच्या प्रमुख उपस्थितीत करण्यात आले.

0 119

स्वयंम पीआर एजंन्सी : ८३६९९२४६४६ – ९८२००९६५७३

पनवेल : उसरण धरण निर्माणानंतर जवळपास ३२ वर्षांनी प्रथमच या धरणाच्या अनुषंगाने नाल्यातून जाणारे गाळ काढण्याचे काम झाले आहे. यासाठी उरण विधानसभा मतदार संघाचे आमदार महेश बालदी यांची मागणी व पाठपुरावा कामी आला आहे. 

देवळोली गावजवळ १९८९ साली उसरण या धरणाची निर्मिती झाली. डोंगर कपाऱ्यात असलेल्या धरणाचे पाणी धरण क्षेत्र ते सावळे, खत कारखाना या दिशेने पाताळगंगा नदीत समाविष्ट होते. धरण तुडुंब भरल्यानंतर धरणाच्या पाण्याच्या प्रवाहातून मातीचा गाळ जात असतो. गेली ३२ वर्षे हा प्रवास सुरु आहे, त्यामुळे प्रवाहात गाळ साचल्याने पुरस्थिती होण्याची शक्यता लक्षात घेऊन आमदार महेश बालदी यांनी लघु पाटबंधारे विभागाकडे गाळ काढण्याची मागणी केली होती. त्या अनुषंगाने यंत्रसामुग्रीच्या माध्यमातून गाळ काढून नागरिकांना मोठा दिलासा दिला आहे. 

0 65

स्वयंम पीआर एजंन्सी : ८३६९९२४६४६ – ९८२००९६५७३

५३ हजार घरांमध्ये पुस्तके भेट देण्याचा नवी मुंबई मनसेचा संकल्प

नवी मुंबई : ४ जून २०२१ रोजी सन्मा. राजसाहेब ठाकरे यांच्या ५३ व्या वाढदिवसाच्या निमित्ताने नवी मुंबई मनसेच्या वतीने ५३ हजार घरांमध्ये मोफत पुस्तके संपूर्ण वर्षभर भेट देण्याचा संकल्प नवी मुंबई मनसेचे शहर अध्यक्ष गजानन काळे यांनी याप्रसंगी केलेला आहे. मराठी १०० पुस्तकांची यादीच मनसेने प्रसिद्ध केलेली आहे. त्यामधील आपल्या आवडत्या पुस्तकाची नोंदणी करण्याचे आवाहन मनसेने केले आहे. सदरच्या पुस्तकांच्या यादीमध्ये सुप्रसिद्ध लेखक/कवी मंगेश पाडगावकर, प्रबोधनकार ठाकरे, अण्णाभाऊ साठे, व. पु. काळे, ना. धों . महानोर, आचार्य अत्रे, डॉ. बाबासाहेब आंबेडकर, विजय तेंडुलकर, स्वातंत्र्यवीर सावरकर, कुसुमाग्रज, महात्मा गांधी, साने गुरुजी, वि. स. खांडेकर, डॉ. अब्दुल कलाम, सुरेश भट अशा कवी/लेखकांच्या गाजलेल्या पुस्तकांचा समावेश आहे. यामध्ये श्यामची आई, फकिरा, अग्निपंख, जिप्सी, शूद्र पूर्वी कोण होते, माझी जीवनगाथा, पार्टनर व. पु. काळे, यशवंतराव आणि मी, वाघनखं , सखाराम बाईंडर, माझी जन्मठेप, नटसम्राट, सत्याचे प्रयोग, रंग आणि गंध, रसवंतीचा मुजरा, शिवछत्रपती एक मागोवा अशा अनेक प्रसिद्ध पुस्तकांची यादी आहे, असे नवी मुंबई मनसेचे शहर अध्यक्ष गजानन काळे यांनी प्रसिद्धी पत्रकाद्वारे कळवले आहे.

या कार्यक्रमाच्या निमित्ताने आपले मत सांगत असताना गजानन काळे यांनी असे म्हटले आहे कि, सन्मा. राजसाहेब ठाकरे हे सध्याच्या राजकारण व समाजकारणातील अभ्यासू व्यक्तिमत्व असून विविध पुस्तके वाचण्याचा छंद राजसाहेबांना आहे. हे संपूर्ण महाराष्ट्राला अवगत आहे. पुस्तक वाचल्याने प्रगल्भ आणि सक्षम समाज घडवण्यास मोठी मदत होते आणि म्हणूनच नवी मुंबई शहरामध्ये वाचन संस्कृती रुजावी याकरिता नवी मुंबई मनसेचा हा छोटासा प्रयत्न असल्याचे मत गजानन काळे यांनी याप्रसंगी व्यक्त केले. कोविड च्या दुसऱ्या लाटेनंतर हळूहळू जीवन पूर्वपदावर येत असताना तसेच या सर्व प्रसंगांमधून नवी मुंबईतील नागरिक जात असताना लॉक डाऊन व कोविड च्या संकटामुळे नागरिकांच्या मनावर खोलवर परिणाम झाल्याचे दिसत आहे. अशा वेळी पुस्तक त्यांना या परिस्थिती मधून बाहेर काढेल असा ठाम विश्वास गजानन काळे यांना आहे.

नवी मुंबई मनसेने या अभियानाची सुरुवात केल्यानंतर काही तासातच १५०० पुस्तकांची नोंदणी नवी मुंबईकरांनी केलेली आहे. तसेच सदर पुस्तकांची नोंदणी करण्याकरिता मनसेने दोन क्रमांक ९०९०५०५०६७ / ८१०८१८१००७ प्रसिद्ध केलेले आहेत. सोशल मीडियाच्या माध्यमातून सुद्धा नागरिक आपले आवडते पुस्तक नोंदवू शकतात. व्हाट्सअप , क्यू आर कोड, तसेच गुगल लिंकच्या माध्यमातून आपली माहिती देऊन आपले आवडते पुस्तक नागरिक नोंदवू शकतात. नवी मुंबईतील नागरिकांनी मोठ्या संख्येने या वाचन चळवळीत सहभाग नोंदवून वाचन संस्कृती वृद्धांगित करण्यासाठी सहकार्य करावे असे आवाहन मनसेचे शहर अध्यक्ष गजानन काळे यांनी केले आहे.

0 181

नवी मुंबई : कोरोना महामारीने त्रस्त झालेल्या जनतेला अन्नधान्याचे वितरण गणेश नाईक चॅरिटेबल ट्रस्ट आणि नवी मुंबई भाजप यांच्यावतीने नवी मुंबईत सुरू आहे. कोरोना महामारी सुरू झाल्यापासून ठाणे जिल्ह्याचे माजी पालकमंत्री, भाजप आमदार लोकनेते गणेश नाईक यांनी एकीकडे आपल्या कार्यकर्ते, पदाधिकारी, माजी नगरसेवक यांच्या माध्यमातून एकीकडे सतत अन्नधान्याचे वाटप तर दुसरीकडे कोरोना महामारीवर प्रशासनाकडून होणाऱ्या उपाययोजनांबाबत दर आठवड्याला लोकनेते गणेश नाईक आपल्या सहकाऱ्यांसमवेत जावून पालिका आयुक्त अभिजित बांगर यांची भेट घेत नवी मुंबईकरांना दिलासा देण्याचे काम करत आहेत. प्रभाग 96 मधील लोकनेते गणेश नाईक यांचे कट्टर कार्यकर्ते जनसेवक गणेश भगत यांनी गणेश नाईक चॅरिटेबल ट्रस्ट आणि नवी मुंबई भाजप यांच्या माध्यमातून आलेले धान्य घरोघरी जावून रहीवाशांना वितरीत करण्यास सुरूवात केली आहे. विशेष म्हणजे संततधार पाऊस असतानाही गणेश भगत यांनी घरटी धान्य मदतीचे कार्य सुरूच ठेवल्याने रहीवाशांकडून या कार्याची प्रशंसा करण्यात येत आहे.
प्रभाग 96 मध्ये नेरूळ सेक्टर 16, 16ए आणि 18 या परिसराचा समावेश होत आहे. गणेश भगत आणि त्यांच्या सहकाऱ्यांनी प्रभागात सर्वानाच घरी जावून धान्याची मदत पोहोचविण्यास सुरूवात केली आहे. गुरूवारपासून (दि. 10 जुन) घरोघरी जावून धान्य पोहोचविण्यास सुरूवात झाली असून पहिल्या टप्प्यात जनसेवक गणेश भगत यांच्या माध्यमातून नेरूळ सेक्टर 16 मध्ये घरोघरी जावून हे अभियान राबविण्यात आले आहे. गणेश भगत यांच्यासमवेत सागर मोहिते, वासुदेव पाटील, विकास तिकोणे, आनंद कदम, गोरक्षनाथ गांडाळ, चंद्रकांत महाजन, रमेश नार्वेकर, अशोक गांडाळ, रोहित चव्हाण. राजेश घाडी. शयेश परशेट्टी, श्रीधर मोरे संदेश घाडी, अजय नवले, शुभम पाटणकर, शुुभम नवले, अजय नवले, सुभाष यादव,.नवीन पाठारे, सग्रामसिंह चव्हाण, गौरव सावंत, सौरव सावंत आदींनी धान्य वितरणात सहभागी होत स्थानिक रहीवाशांना दिलासा देण्याचे काम केले आहे. साखर, तांदूळ, गव्हाचे पीठ, डाळ आदी धान्य मिळाल्याने स्थानिक रहीवाशी लोकनेते गणेश नाईकांच्या जनसेवी कार्याची प्रशंसा करत आहेत.

0 91

        कोरोना कोरोना करत दोन वर्षे सरली… आतापर्यंत कोरोनाचा प्रादूर्भाव रोखण्यासाठी  सर्वात प्रभावी उपाययोजना ठरली ती म्हणजे लॉकडाऊन. सारखा सारखा लॉकडाऊन जनतेला काय शासनालाही परवडणार नाही. शासनाने कोरोनाचा प्रादूर्भाव रोखण्यासाठी वेळोवेळी विविध उपाययोजना केल्या. जनतेनेही शासनाच्या सुचनांचे काटेकोरपणे पालन केले. त्यामुळेच आज दूसऱ्या लाटेचाही सामना यशस्वीपणे करता आला.  आता तिसऱ्या लाटेला कसे थोपवता येईल यासाठी शासनाचे कशोसीने प्रयत्न चालू आहेत. शक्यतो तिसरी लाट येऊच नये,यासाठी शासन नवनवीन उपाययोजना आखत आहे. राज्यातील अनेक सरपंच व गावांनीसुध्दा कोरोनाला आपल्या गावच्या वेशीवर रोखण्याचा विविध चांगले उपक्रम राबविलेले आहेत.

            मागच्या वर्षी शहरी भागात कोरोनाचा प्रादूर्भाव मोठया प्रमाणात होता. कोरोनाच्या भितीने शहरातील जनता मोठया संख्येने आपापल्या गावी गेली. त्यामुळे कोरोना ग्रामीण भागातही पोहोचला आहे. कोरोनाचे संकट लवकरात लवकर संपवायचे असेल तर, गावपातळीवरील ग्रामपंचायत सरपंचांनी आपापले गाव कोरोनामुक्त करण्यातसाठी पुढाकार घेणे आवश्यक आहे.

            आपले राज्य कोरोनामुक्त व्हावे यासाठी सर्व ग्रामपंचायतींमध्ये कोरोनावर मात करण्याची जिद्द उत्पन्न व्हावी ‘कोरोनामुक्त गांव स्पर्धा योजना’ राबविण्याचा निर्णय शासनाने घेतला आहे. सरपंचांनी गावाचे पालक म्हणून जबाबदारी घ्यावी व शासनाच्या सूचनांप्रमाणे विविध उपाययोजना राबवून  ‘माझे गाव, कोरोना मुक्त गाव’ चे ध्येय लवकर साध्य करावे असे आवाहन मा. मुख्यमंत्री उध्दव ठाकरे यांनी नुकत्याच एका कार्यक्रमात केले आहे.

कोरोनाचे समुळ उच्चाटण करण्यासाठी ‘कोरोनामुक्त गाव स्पर्धा योजना’ या स्पर्धेत जास्तीत जास्त गावांनी सहभाग घेणे आवश्यक आहे.या स्पर्धेतील नियमानुसार राज्यातील प्रत्येक ग्रामपंचायतीने कोरोनामुक्तीसाठी ग्रामपंचायतीच्या स्तरावर पाच पथकांची स्थापना करणे आवश्यक आहे. तसेच त्यांनी नेमून दिलेली कार्ये करणे, निकषानुसार गुणांकन करणे व ग्रामपंचायतीने स्वयंमुल्याकन संबंधित गट विकास अधिकारी यांना  सादर करावायाचे आहे. पथकांची माहिती पुढील प्रमाणे आहे.

            पथक क्रमांक-1 कुटूंब सर्वेक्षण पथक (ग्रामपंचायत प्रभाग निहाय)- सदर पथक वार्ड, तांडा, वाडी अथवा वस्तीनिहाय ग्रामपंचायत सदस्य, आरोग्य सेविका/अंगणवाडी सेविका/आशा वर्कर/जिल्हा परिषद शिक्षक तसेच अन्य संस्थेचा प्रतिनिधी (स्वयंसेवक) इत्यादी सदस्यांच्या समावेश करून संबंधित ग्रामपंचायतीनी पथकाची स्थापना करावी. हे पथक कुटूंबातील प्रत्येक सदस्याची कोविड-19 संबंधित आजाराची लक्षणे ऑक्सीजन पातळी, ताप, सर्दी, खोकला, थकवा आणि इतर लक्षणे असलेल्या व्यक्तीच्या नोंदी घेणे, प्रत्येक कुटूंबाला भेट देताना कोविड-19 च्या सर्व नियमांचे पालन करून कुटूंबातील वृध्द व्यक्ती, लहान मुले, गरोदर स्त्रीया यांची घ्यावयाची काळजी यांचे नियम समजावून सांगणे, AUTOIMMUNE DISEASE श्वसनासंबंधीचे दमा किंवा इतर आजार, मधुमेह, उच्च रक्तदाब (HYPER TENSION) आजाराची माहिती घेणे व तद्संबंधीत आजाराची व्यक्ती आढळल्यास अशा रुग्ण व्यक्तींची यादी करणे व त्यांना योग्य उपचार घेणे व त्याबाबत विशेष काळजी घेण्याचे आवाहन करणे ही सर्व कामे करेल.

            पथक क्रमांक-2 विलगीकरण कक्ष स्थापन करून पुढीलप्रमाणे कार्ये करण्यात यावे- कोविड-19 विलगीकरण कक्ष सरकारी नियमानुसार संबंधित प्राथमिक आरोग्य उपकेंद्र व ग्रामपचांयतीमधील कार्यरत अधिकृत डॉक्टर यांच्या संयुक्त विद्यमाने तयार करण्यात यावे. त्यात दोन स्वतंत्र कक्ष तयार करून त्यामध्ये बाधित व्यक्ती आणि संपर्कातील व्यक्तींना स्वतंत्र कक्षात ठेवण्यात यावे, कोविड-19 विलगीकरण कक्षात 24 तास गरम पाणी ठेवण्यात यावे व शौचालय स्वच्छ ठेवावीत, कोविड बाधित रुग्णांच्या आहार व औषध उपचारावर नियमित लक्ष ठेवणे, गावातील रुग्णांची लक्षणे वाढत असल्यास तात्काळ हेल्पलाईन पथकातील डॉक्टरांना सूचित करणे.

            पथक क्रमांक-3 कोरोना तपासणीसाठी रुग्णालयात भरत करण्यासाठी घेऊन जाणाऱ्या वाहन चालकांचे पथक- विलगीकाण कक्षातील लोकांना आवश्यकतेनुसार रुग्णालयात ॲडमीट करण्याची गरत असेल त्यासाठी गावातील उपलब्ध गाडया त्यांच्या येण्या-जाण्यासाठी व्यवस्था करणे आवश्यक आहे. यासाठी राज्यातील प्रत्येक ग्रामपंचायतीने कोरोना तपासणीसाठी व रुग्णालयात भरती करण्यासाठी घेऊन जाणाऱ्या वाहन चालकांचे पथक ग्रामपंचायतीच्या स्तरावर गावातील वाहनचालकांची स्वंयसेवक म्हणून निवड करून पथकांची स्थापना करावी.

            पथकाची कार्ये- पथकातील वाहन चालकाने रुग्णासाठी वापरात असलेल्या वाहनात वाहन चालकाच्या सीटच्या मागे प्रोटेक्टिव्ह शिल्ड लावणे, प्रोटेक्टिव्ह शिल्डच्या मागे रुग्णांना बसून हॉस्पिटलला घेऊन जाणे व लगेच गाडी निर्जंतुक करणे, या पथकातील वाहन चालकांनी केलेल्या कार्यामुळे रुग्ण स्वत:च्या कुटूंबातील किंवा इतर व्यक्तीना तपासणीसाठी सोबत घेऊन जाण्याची गरज पडणार नाही. त्यामुळे रुग्णाबरोबर थेट संपर्क टाळल्यामुळे कोविड-19 चा प्रसार रोखण्यास मदत होईल.

            पथक क्रमांक-4 कोविड हेल्पलाईन पथक- सदर पथकामध्ये गावातील खाजगी डॉक्टर, प्राथमिक आरोग्य उपकेंद्र/केंद्र येथील डॉक्टर, फॉर्मासिष्ट (औषध निर्माता) आणि इतर क्षेत्रातील लोकांचा समावेश करून ग्रामपंचायतीने डॉक्टर हेल्पलाईन पथकांची स्थापना करावी.

            कोविड-19हेल्पलाईन पथकाची कार्य- कोविड-19 पॉझिटिव्ह आलेल्या रुग्णांना आवश्यक ते उपचार तातडीने डॉक्टरांचे सहाय्य घेऊन चालू करण्यास मदत करणे, रुग्णाची वेळोवेळी तपासणी करणे व आवश्यक तपासण्या नामपात्र दरात करणे, आवश्यकता असलेल्या रुग्णांना जिल्हयाच्या ठिकाणी मुख्य रुग्णालयात भरती करणे, रुग्ण ॲडमिट करतना बेडच्या उपलब्धतेबाबत व उपचारादरम्यान औषधांच्या कमतरतेबाबत येणाऱ्या समस्यांचे निराकरण करण्यास मदत करणे, कोविड-19 या आजारानंतर मानवी शरीरात काही गुंतागुंत निर्माण होऊ शकतात. उदा.नवीनच आढळलेला म्युकॉरमायकोसिस आजाराशी साधर्म्य लक्षणाची माहिती देणे व पुढील उपचारासाठी संबंधित रुग्णालयात तातडीने पाठविण्याची व्यवस्था करणे, विशेष म्हणजे लहान मुलांची विशेष काळजी घेण्यासाठी कोविड-19 च्या संबंधीत सर्व सर्व नियम माहिती वेळोवेळी गावातील कुटूंबापर्यंत पोहचविणे.

            पथक क्रमांक-5 कोविड-19 लसीकरण पथक- राज्यातील प्रत्येक ग्रामपंचायतीने कोविड-19 लसीकरण करण्यासाठी तपासणीसाठी ग्रामपंचायतीच्या संबंधित वैद्यकीय अधिकारी, प्राथमिक आरोग्य केंद्र/उपकेंद्र आरोग्य सेविका/आरोग्यसेवक, खाजगी डॉक्टर, स्वयंसेवक आणि ग्रामपंचायत प्रतिनिधी अशा सदस्यांचा समावेश करून पथकांची स्थापना करावी. हे पथक शासकीय नियमानुसार वय वर्षे 45 विशेषत: जुने आजार उदा.मधुमेह, दमा, उच्च रक्तदाब इत्यादी असणाऱ्या व्यक्तींचे पथकाच्या माध्यमातून प्राधान्याने कोविड-19 चे लसीकरण करण्यात यावे, लसीकरणासाठी पात्र लाभार्थ्यांची यादी अगोदर तयार करून त्यानुसार ग्रामपंचायत कार्यालयात स्वयंसेवकामार्फत नोंदणी करणे, शासनाच्या धोरणानुसार कोविड-19 लसीकरणाच्या बाबतीत कोणत्याही नियमांचे उल्लंघन होणार नाही याची दक्षता घ्यावी, प्रथम कोविड प्रतिबंध लसीकरण 100 टक्के पुर्ण करण्यात येईल असे नियोजन करणे, गावातील नागरिकांची वेळोवेळी ॲन्टीजन टेस्ट करण्याचे ही काम करेल.

            सदर योजनेच्या निकषानुसार गुणांकन स्वयंमुल्याकन ग्रामपंचायती तयार करून 1 महिन्याच्या कालावधीत संबंधित गट विकास अधिकारी यांच्याकडे पुरस्कारासाठी निवड होण्याच्यादृष्टीने सादर करतील. प्राप्त झालेल्या सर्व ग्रामपंचायतीच्या स्वयंमुल्याकनगट विकास अधिकारी हे तपासणी करून सर्वाधिक गुण प्राप्त 10 ग्रामपंचायतींची यादी तयार करून आवश्यक अहवालासह मुख्य कार्यकारी अधिकारी जिल्हा परिषद यांच्याकडे करतील. मुख्य कार्यकारी अधिकारी जिल्हा परिषद हे प्राप्त गुणांकन यादीमधील सर्व गावांची तपासणी करून जिल्हयातून सर्वाधिक गुण प्राप्त 3 गावांची शिफारस उपायुक्त (विकास), विभागीय आयुक्त कार्यालय यांच्याकडे सादर करतील. उपायुक्त (विकास) हेविभागातील सर्व जिल्हयांकडून प्राप्त झालेल्या गुणांकनाची पडताळणी करून विभागीय आयुक्तांच्या मान्यतेने विभागवार प्रथम, द्वितीय आणि तृतीय सर्वाधिक गुण प्राप्त होणाऱ्या ग्रामपंचायतीची अंतिम निवड करतील.

            या दोन्ही योजना मिळून प्रथम, द्वितीय  आणि तृतीय क्रमांक प्राप्त ग्रामपंचायतींना अनुक्रमे (1) रु.50 लाख, 2) रु.25 लाख, 3) रु.15 लाख इतका निधी ग्रामविकास विभागामार्फत विकास कामासाठी ग्रामपंचायतीच्या मागणीनुसार ग्रामपंचायतींना दिला जाईल. कोविड-19 व्यवस्थापन कोरोनामुक्त गाव स्पर्धेत विजेता ठरलेल्या ग्रामपंचायतींना पुरस्काराची रक्कम वितरीत करण्यात येईल. कोरोनामुक्त गांव स्पर्धेसाठी निकषानुसार सर्वात जास्त गुण प्राप्त ग्रामपंचायतींना राज्यातील 6 महसूली विभाग निहाय प्रत्येक महसुल विभागातून प्रथम बक्षीस रु.50 लाख, रु.25 लाख, रु.15 लाख असे तीन विभागवार पुरस्कारांची रक्कम वितरीत करण्यात येईल. निकषानुसार मुल्यांकन करून गुण देण्यासाठी दि.1 जून 2021 ते 31 मार्च 2022 हा कालावधी ग्रामपंचायतींनी केलेले कार्ये विचारात घेण्यात येणार आहे.

            या योजनांकरिता निवडण्यात येणारी ग्रामपंचायत शासनाकडून देण्यात आलेल्या निकषांच्या आधारे गुणांकन पध्दतीने पारदर्शकपणे निवड करण्यात येईल. आर.आर.(आबा) पाटील सुंदर गाव योजना अंतर्गत पुरस्कार वितरण व कोविड-19 व्यवस्थापन कोरोनामुक्त गांव स्पर्धेत विजेता ठरलेल्या ग्रामपंचायतींना पुरस्काराची रक्कम जिल्हयाच्या ठिकाणी एकत्रित कार्यक्रमात वितरीत करण्यात येईल.

कोविड-19 व्यवस्थापनासाठी कोरोनामुक्त गाव स्पर्धेसाठीचे निकष व गुणांकन पुढीलप्रमाणे आहेत. 1) कोविड-19 व्यवस्थापनासाठी ग्रामस्तरावर कोरोनामुक्त समितीची निर्मिती करणे. त्यात सरपंच, उपसरपंच, ग्रामसेवक, तलाठी, आरोग्य कर्मचारी, गावातील सर्वसामान्य असणाऱ्या व्यक्तीचा समावेश करणे. 2) ग्रामस्तरावर मुख्य समितीच्या अंतर्गत विविध पथकांची निर्मिती करणे त्यात आरोग्य कर्मचारी, खाजगी डॉक्टर व गावातील स्वयंसेवक यांचा समावेश करणे. 3) कोरोनामुक्त गाव होण्यासाठी कोरोना बाधीत कुटूंबाचे सर्वेक्षण व कॉनटॅक्ट ट्रेसिंग करणे. 4) ANTIGEN TEST ची सुविधा गाव पातळीवर उपलब्ध करणे व संशयित रुग्ण संख्येच्या प्रमाणात. 5) ANTIGEN TEST मध्ये POSITIVE आढळलेल्या रुग्णांना तत्काळ पुढील उपचारासाठी डॉक्टरांच्या सल्ल्यानुसार कोविड केअर सेंटर किंवा हॉस्पिटलमध्ये पाठविणे. 6) ANTIGEN TEST मध्ये         NEGETIVE आहे परंतु लक्षणे दिसतात अशा व्यक्तींना संशयित कोविड रुग्ण म्हणून विलगीकरण कक्षात ठेवणे. 7) रुग्णांना विलगीकरण कक्ष किंवा हॉस्पिटल पर्यंत वाहतुकीसाठी वाहनांची व्यवस्था अल्पदरात करणे. 8) कोविड-19 विलगीकरण कक्षात गरम पाणी/वीज/स्वच्छता/मास्क व सॅनिटायझरची सुविधा उपलब्ध करणे तसेच शौचालयाची साफसफाई नियमितपणे करणे. 9) गावातील खाजगी डॉक्टरांचा व फार्माशिष्ट यांचा कोविड-19 साठी सक्रिय सहभाग रुग्णांच्या शरीरात प्रतिकारशक्ती निर्माण होण्यासाठी आहार आणि औषधाविषयी मार्गदर्शन करणे लोकसंख्येच्या हजारी प्रमाणात. 10) कुटूंबातील सर्व सदस्य POSITIVE आल्यावर पथकातील स्वयंसेवकामार्फत आवश्यक ती मदत करणे. 11) एखाद्या शेतकरी कुटूंबातील सर्व सदस्य कोविड-19 POSITIVE आल्यावर त्यांच्याकडील उत्पादित दुध व भाजीपाला अनुक्रमे दुधडेअरी व संबंधित मार्केटला स्वयंसेवकामार्फत पोहच करणे. 12) दूध उत्पादक संस्था, विविध कार्यकारी विकास सोसायटी, महिला बचत गट, स्वयंसेवी संस्था, तंटामुक्त गाव समिती, पतसंस्था यांचा सक्रीय सहभाग. 13) कोरोना बाधित कुटूंबाचे मनोबल वाढविण्यासाठी त्यांच्या कुटूंबातील सदस्यांशी आणि संबंधित डॉक्टरांशी कोविड-19 हेल्पलाईन समिती प्रमुखाने नियमित संवाद साधणे. 14) कोरोना विरहित सुरक्षित कुटूंबाची विशेष नोंद ठेवणे व त्या कुटूंबाना कोरोनाची बाधा होणार नाही यासाठी जनजागृती करणे. 15) कोविड-19 ची लक्षणे आढळलेल्या रुग्णांना तात्काळ संबंधित पथकातील स्वयंसेवकामार्फत पुढील उपचारासाठी  व्यवस्था करणे. 16)  कोविड-19 लसीकरणासाठी मदत करणे व उपलब्ध लसीचे शासकीय नियमानुसार योग्य वाटप. 17) लहान बालकांचे, गरोदर मातांचे सर्वेक्षण करणे. 18) जनजागृतीसाठी केलेले प्रभावी उपाययोजना, विविध तंत्रज्ञानाचा वापर. 19) नोकरीनिमित्त किंवा व्यवसायनिमित्त (चाकरमाने) बाहेरगावी असणाऱ्या व्यक्ती घेतलेली खबरदारी. 20) पथकातील एकही स्वयंसेवक कोरोना बाधित न होण्यासाठी नियमांचे पालन करणे. या सर्व निकषास निकषाच्या प्रमाणानुसार 100 टक्के 2 गुण, 75-99 टक्के 1 गुण, 50-74 टक्के 0.50 गुण असतील तर कमाल गुण 2 असतील.

मृत्यूदर कमी असावा (गावातील लोकसंख्येच्या हजारी दराप्रमाणे) या निकषास निकषाच्या प्रमाणानुसार संख्या 0-2 गुण, 1-10 संख्या 1 गुण, 10 पेक्षा जास्त संख्या 0.50 गुण असतील तर कमाल गुण 2 असतील. तसेच आई वडिलांचे दुदैवाने कोरोनामुळे निधन झाल्यास अनाथ मुलांचा/मुलींचा सांभाळ करणे 100 टक्के 4 गुण, 75-99 टक्के 3 गुण, 50-74 टक्के 2 गुण असतील तर कमाल गुण 4 याप्रमाणे एकूण 50 गुण असतील. 

आतापर्यंत ज्या ग्रामपंचायतींनी कोरोना काळात उत्तम काम केले आहे.अशा ग्रामपंचायतींच्या कामांची दखल घेत मा.मुख्यमंत्री महोदंयानी राज्याच्या जनतेला उद्देशून केलेल्या भाषणामधून याचा संदर्भ देऊन त्यांचा गौरव केलेला आहे. मा.मुख्यमंत्री महोदंयाच्या आवाहनानुसार आपण आपले कुटूंब, आपला मोहल्ला, आपली वाडी-वस्ती, आपले गांव कोरोनामुक्त केले तर तालुका, जिल्हा व राज्य कोरोनामुक्त होण्यास वेळ लागणार नाही.

******* 

प्रविण रा.डोंगरदिवे

माहिती सहाय्यक

विभागीय माहिती कार्यालय

कोकण विभाग, नवी मुंबई

0 193

नवी मुंबई : कोपरखैराणे सेक्टर 22 व 23 मधील महापालिकेची उद्याने तसेच सेक्टर 14 मधील महापालिकेचे निसर्ग उद्यान सर्वसामान्य जनतेसाठी लवकरात लवकर खुले करण्याची मागणी समाजसेविका सुनिता देविदास हांडेपाटील यांनी महापालिका आयुक्त अभिजित बांगर यांच्याकडे एका लेखी निवेदनातून केली आहे.
महापालिका प्रशासनाच्या अथक प्रयत्नांमुळे कोरोना महामारी आटोक्यात आली असून नवी मुंबईत सर्वत्र अनलॉकची प्रक्रिया सुरू झालेली आहे. कोरोनामुळे रहीवाशी, महिला, मुले, युवक, युवती, ज्येष्ठ नागरिक घरात बसून त्यांनाही कंटाळा आलेला आहे. महापालिका प्रशासनाने कोपरखैराणे सेक्टर 22 व 23 मधील महापालिकेची उद्याने तसेच कोपरखैराणे सेक्टर 14 मधील निसर्ग उद्यान जनतेसाठी त्वरीत खुले करण्याची मागणी समाजसेविका सुनिता देविदास हांडेपाटील यांनी महापालिका आयुक्त अभिजित बांगर यांच्याकडे एका लेखी निवेदनातून केली आहे.

0 96

स्वयंम पीआर एजंन्सी : ८३६९९२४६४६ – ९८२००९६५७३

मुंबई : पदोन्नतीमधील आरक्षण हा मागासवर्गीयांचा संविधानात्मक अधिकार आहे.त्यामुळे राज्य सरकार ने त्वरित पदोन्नतीमधील आरक्षणाचा निर्णय घ्यावा या मागणीसाठी आज रिपब्लिकन पक्षाच्या वतीने अंधेरी तहसील कार्यलयावर तीव्र निदर्शने आंदोलन करण्यात आले. केंद्रीय राज्यमंत्री रामदास आठवले यांच्या आदेशानुसार झालेल्या या आंदोलनाचे नेतृत्व रिपाइंचे मुंबई अध्यक्ष गौतम सोनवणे ; जिल्हा अध्यक्ष प्रकाश कमलाकर जाधव यांनी केले. यावेळी जयंतीभाई गडा; रतन अस्वारे; बाबुराव बनसोडे; किसन रोकडे; सो ना कांबळे; अंकुश हिवाळे; सोमा देवेंद्र  शेखर सुब्रमण्यम; श्रीमंत तोरणे; फुलचंद कांबळे; रमेश पाईकराव; दीपक बाबर ; सुनील पवार आदी पदाधिकारी या आंदोलनात सहभागी झाले होते.

0 136

स्वयंम पीआर एजंन्सी : ८३६९९२४६४६ – ९८२००९६५७३

 केंद्राने घेतलेली लसीकरणाची जबाबदारी नीट पार पाडावी:

 मुंबई : पंतप्रधान नरेंद्र मोदी यांनी आज अखेर देशातील लसीकरणाची जबाबदारी घेतली हा निर्णय चांगला आहे पण तो घेण्यास उशीर झाला. राज्यांवर जबाबदारी ढकलून नामानिराळे राहिलेल्या मोदी सरकारला सुप्रीम कोर्टाने धारेवर धरून लसीकरण मोहिमेची सर्व माहिती मागवताच केंद्र सरकारला जाग आली आणि आज केंद्र सरकारने लसीकरणाची जबाबदारी घेतली, असा टोला महसूल मंत्री बाळासाहेब थोरात यांनी लगावला आहे. 

यासंदर्भात बोलताना थोरात म्हणाले की, देशात आतापर्यंत ज्या लसीकरण मोहिमा झाल्या त्यांची जबाबदारी केंद्र सरकारांनीच घेतली होती. पण मोदी सरकारने आपली जबाबदारी राज्यांवर ढकलून पळ काढला होता. काँग्रेस पक्ष, मा. सोनियाजी गांधी, खा. राहुल गांधी यांनी हा मुद्दा लावून धरला. देशभरातून केंद्र सरकारच्या लसीकरण धोरणांवर टीका होऊ लागली आणि सुप्रिम कोर्टाने फटकारल्यावर आता नाईलाजाने लसीकरणाची जबाबदारी घेतली आहे. आता केंद्राने जबाबदारी घेतलीच आहे तर ती नीट पार पाडावी हीच अपेक्षा आहे. 

कोर्टानं दट्ट्या दिल्यानंतर राज्यांवर लसीकरण सोडणं हे केंद्र सरकारला महागात पडणार हे दिसतच होतं. मोदींनी हुशारीने आपले अपयश लपवण्यासाठी राज्यांची विनंती आहे, राज्य सरकारे आता असमर्थ ठरत आहेत, पुर्नविचारांची मागणी करत आहेत असे म्हणत सोयीस्करपणे बगल दिली. पण महाराष्ट्र सरकारने मात्र लसीकरणाची जबाबदारी घेऊन एकरकमी पैसे देऊन राज्यातील जनतेला लस देण्याचा निर्णय घेतला होता. केंद्र सरकारच्या आडमुठेपणामुळेच लसीकरण मोहिमेला गती येत नव्हती. केंद्र सरकारला उशिरा शहाणपण आले आहे, असे थोरात म्हणाले.

कोविन या ऍप्लिकेशन मध्ये अजूनही अडचणी आहेत, जिल्हा ओलांडून लोक लसीकरण करून घेण्यासाठी जात आहे, त्यामुळे स्थानिक नागरिकांमध्ये असंतोष तयार होतो. त्यातून अनेक प्रश्न निर्माण होतात, त्यामुळे या त्रुटी दूर करून केंद्राने लसीकरण मोहिमेत सुसूत्रता आणावी, महाराष्ट्र सरकार त्यासाठी केंद्राला पूर्ण क्षमतेने मदत करेल, असेही थोरात म्हणाले

0 179

स्वयंम पीआर एजंन्सी : ८३६९९२४६४६ – ९८२००९६५७३

१० जूनला भव्य मानवी साखळीची जोरदार तयारी 

मुंबई : नवी मुंबईतील आंतरराष्ट्रीय विमानतळाला दिवंगत लोकनेते दि. बा. पाटील यांचेच नाव द्यावे, अशी मागणी मुंबई, नवी मुंबई, ठाणे, रायगड, पालघर आदी जिल्ह्यांतील लोकप्रतिनिधी प्रकल्पग्रस्त शेतकरी, कष्टकरी, ओबीसी जनता सुरुवातीपासून करीत आहे. या मागणीकडे सरकारचे लक्ष वेधण्यासाठी येत्या १० जून रोजी वरील जिल्हयात मानवी साखळी आंदोलन करण्यात येणार आहे, अशी माहिती लोकनेते दि. बा. पाटील नवी मुंबई आंतरराष्ट्रीय विमानतळ सर्वपक्षीय कृती समितीचे अध्यक्ष दशरथदादा पाटील यांनी आज मुंबई येथे झालेल्या पत्रकार परिषदेत दिली. 

        मुंबई मराठी पत्रकार संघाच्या सभागृहात झालेल्या या पत्रकार परिषदेस नवी मुंबई आंतरराष्ट्रीय विमानतळ सर्वपक्षीय कृती समितीचे उपाध्यक्ष माजी खासदार रामशेठ ठाकूर, भाजपचे उत्तर रायगड जिल्हाध्यक्ष आमदार प्रशांत ठाकूर, आमदार महेश बालदी, महाराष्ट्र प्रदेश काँग्रेस कमिटीचे सचिव संतोष केणे, सर्वपक्षीय कृती समितीचे सहचिटणीस दीपक म्हात्रे, खजिनदार जे. डी. तांडेल, गुलाबराव वझे, पनवेल महानगर पालिकेचे उपमहापौर व आरपीआय कोकण प्रांत अध्यक्ष जगदीश गायकवाड, भाजपचे युवा नेते दशरथ म्हात्रे, कृती समितीचे पदाधिकारी उपस्थित होते. 

         यावेळी माहिती देताना दशरथदादा पाटील यांनी सांगितले की, लोकनेते दि. बा. पाटील यांचे  नाव विमानतळाला देण्यासाठी यापूर्वी राज्य आणि केंद्र सरकारकडे विनंती करण्यात आली आहे. तरी देखील अचानकपणे १७ एप्रिल रोजी सिडकोच्या संचालक मंडळाने लोकभावनेचा  विचार न करता शिवसेनाप्रमुख बाळासाहेब ठाकरे यांचे नाव देण्याचा प्रस्ताव मंजूर केला. त्यामुळे रायगड, नवी मुंबई, ठाणे, पालघर, कल्याण, डोंबिवली, अंबरनाथ, मुंबई या विभागातील प्रकल्पग्रस्त शेतकरी, कष्टकरी सर्व समाजातील जनतेमध्ये प्रचंड असंतोष निर्माण झाला आहे. हे सारे प्रकल्पग्रस्त तसेच सामाजिक व राजकीय संघटनांनी येत्या १० जून रोजी भव्य मानवी साखळी आंदोलन करण्याचा निर्णय घेतला आहे. या आंदोलनात २५ ते ३० हजार लोकांचा सहभाग असणार असल्याचे सांगून तशी तयारी झाली असल्याचेही त्यांनी नमूद केले. तसेच सरकारने याबाबत निर्णय न घेतल्यास हे आंदोलन अधिक तीव्र करण्याचा इशाराही त्यांनी यावेळी दिला. त्या अनुषंगाने २४ जूनला लोकनेते दि. बा. पाटील यांच्या स्मृतिदिनी सिडकोला भव्य आंदोलनातून घेराव घालण्यात येणार असल्याचे त्यांनी स्पष्ट केले. 

         बहुजनांच्या हितासाठी लोकनेते दि. बा. पाटील यांनी स्वतःचे आयुष्य खर्च केले त्यामुळे त्यांचे नाव विमानतळाला द्यावे, अशी सर्व समाजातील लोकांचीही मागणी आहे. जसाच्या येथे झालेल्या बैठकीत सर्वपक्षीय नेते आणि कार्यकर्ते उपस्थित होते, त्यावेळी दि.बा. पाटील यांच्या नावासाठी मागणी आणि त्या अनुषंगाने लढा देण्याचे ठरले.  या संदर्भातील मुख्यमंत्री उद्धव ठाकरे, उपमुख्यमंत्री अजित पवार, खासदार शरद पवार, यांच्यासह मंत्रिमंडळातील प्रमुखांना  पत्रव्यवहार केला  आणि पाठपुरावाही सुरु झाला. मात्र त्यांचा कुठलाही प्रतिसाद आला नाही त्यामुळे दि. बा. पाटील यांनी दिलेल्या ‘संघर्षाशिवाय काही मिळत नसते’ या वचनाप्रमाणे सर्वपक्षीय कृती समितीने आंदोलनाचा पवित्रा घेतला असल्याचे दशरथदादा पाटील यांनी यावेळी अधोरेखित केले.  या संदर्भात आमची सरकारकडे मागणी तसेच मुख्यमंत्र्यांनी तातडीने बैठक बोलवणे आवश्यक आहे आणि त्यात चर्चा होणे आवश्यक आहे.  उद्या वादग्रस्त प्रश्न होण्यापूर्वी शांततेने प्रश्न सुटावा, त्यासंदर्भात मुख्यमंत्री व मंत्री महोदयांना पत्रव्यवहार केला आहे. पण दिबांचे नाव विमानतळाला देण्यात यावे ही आमची मागणी आहे. 

      यावेळी पत्रकारांना माहिती देताना माजी खासदार रामशेठ ठाकूर म्हणाले की, २ जानेवारी २०१५ रोजी खासदार कपिल पाटील यांनी लोकभावनेचा विचार करून लोकसभेत ही मागणी केली. त्या संबंधीचे पत्र पंतप्रधान नरेंद्र मोदी यांना दिले आहे. तसेच महाराष्ट्र प्रदेश काँग्रेस कमिटीचे तत्कालीन अध्यक्ष व सध्याच्या मंत्रिमंडळातील सार्वजनिक बांधकाम खात्याचे मंत्री ना. अशोक चव्हाण यांच्याकडे दि. बा. पाटील यांच्या नावाचा प्रस्ताव दिला असता त्यांनी तो तत्कालीन मुख्यमंत्री देवेंद्र फडणवीस यांच्याकडे १९ जून २०१८ रोजी पाठविला. देवेंद्र फडणवीस यांनीसुद्धा तो प्रस्ताव उचित कार्यवाही करण्याच्या सूचनेसह प्रधान सचिव (विमानचालन) यांच्याकडे पाठविला होता. तसे ७ जुलै २०१८ रोजी अशोक चव्हाण यांना मुख्यमंत्र्यांनी लेखी कळविलेही होते. तसेच स्थानिक दहा गाव विमानतळ प्रकल्पबाधित संघटनेच्या वतीने व विविध सामाजिक संघटनांच्या वतीने सिडकोकडेही मागणीही केली होती. पण ही लोकभावना लक्षात न घेता सिडकोने आता जी कृती केली आहे. त्यामुळे प्रकल्पग्रस्त शेतकऱ्यांमध्ये सिडकोविरुद्ध तीव्र संताप व्यक्त करण्यात येत आहे, असेही रामशेठ ठाकूर यांनी सांगितले. दि. बा. पाटील साहेबांमुळे प्रकल्पग्रस्तांना न्याय मिळाला, त्यांनी संघर्ष केला नसता तर येथील प्रकल्पगस्त, शेतकरी, स्थानिक, नागरिकांच्या पदरी काहीही पडले नसते. त्यांच्यामुळे परिसराचा विकास झाला ते सर्वांचे आधारस्तंभ राहिले आहेत. साडेबारा आणि साडे बावीस टक्केचा निर्णय त्यांच्या संघर्षातून निर्माण झाला आहे. त्यामुळे खऱ्या अर्थाने प्रकल्पग्रस्त गावांमध्ये वैभव पहायला मिळते. त्यामुळे नवी मुंबई विमानतळाला प्रकल्पगस्तांचे नेते दि. बा. पाटील यांचेच नाव द्यावे हि ९५ टक्के लोकांची मागणी आहे. आणि त्याप्रमाणे विविध ग्रामपंचायतींनी, गावांनी ठराव सुद्धा केला आहे, असेही त्यांनी आवर्जून नमूद केले.  दि. बा. पाटील असताना प्रकल्पग्रस्तानच्या ५० टक्के मागण्या पूर्ण झाल्या आहेत, आजही ५० टक्के मागण्या प्रलंबित आहे. नामकरणाबरोबरच प्रलंबित मागण्या पूर्ण करण्यासाठीची कृती समितीची भूमिका असल्याचे त्यांनी यावेळी नमूद केली. सिंधुदुर्ग येथील चिपी विमानतळाला स्व. बाळासाहेब ठाकरे यांचे नाव द्या असे माजी मुख्यमंत्री नारायण राणे यांनी सूचित केले होते त्यावेळी त्या विभागातील खासदार विनायक राऊत यांनी विमानतळ व्हायला एक दोन वर्ष वेळ आहे असे सांगितले मग नवी मुंबई विमानतळ पूर्ण व्हायला चार वर्षे लागतील असे असतानाही तिकडे वेगळे इकडे वेगळे हि काय भूमिका आहे. जनता सुज्ञ आहे, त्यामुळे लोकनेते दि. बा. पाटील यांचेच नाव नवी मुंबई विमानतळाला देण्यात यावे. 

         यावेळी आमदार प्रशांत ठाकूर यांनी सांगितले की, लोकनेते दि. बा. पाटील यांच्या नावाचा आग्रह  सुरुवातीपासूनच प्रकल्पग्रस्त शेतकरी, कष्टकरी जनता आणि राजकीय पक्षाचे नेते करीत आले आहेत. कारण दि. बा. पाटील यांची नवी मुंबई ही कर्मभूमी आहे. इथल्या भूमिपुत्रांना, प्रकल्पग्रस्तांना, कष्टकरी शेतकऱ्यांना न्याय मिळवून देण्यासाठी त्यांनी आपले संबंध आयुष्य वेचले आहे. १९८४ साली शेतकऱ्यांच्या जमितीला योग्य भाव मिळावा यासाठी त्यांच्या नेतृत्वाखाली झालेल्या व देशभर गाजलेल्या शौर्यशाली लढ्यातून शेतकऱ्यांना साडेबारा टक्के विकसित जमीन देण्याचे तत्त्व जे प्रस्थापित झाले ते पुढे संबंध महाराष्ट्रातील प्रकल्पग्रस्त शेतकऱ्यांना लागू झाले. त्यामुळे दि. बा. पाटील हे  महाराष्ट्रातील शेतकऱ्यांचे व प्रकल्पग्रस्तांचे लोकनेते होते, अशी माहिती आमदार प्रशांत ठाकूर यांनी पत्रकारांना दिली. तसेच १० जूनच्या मानवी साखळी आंदोलनात रायगड ते मुंबईपर्यंत विविध पक्षातील कार्यकर्ते,  संस्था संघटनांचे पदाधिकारी कार्यकर्ते सहभागी होणार आहेत. असेही त्यांनी सांगितले. 

आरपीआयचे अध्यक्ष रामदास आठवले यांनीही प्रकल्पग्रस्तांचे नेते दि. बा. पाटील यांचे नाव द्यावे अशी भूमिका मांडली असून पाठिंबा दिला. त्या अनुषंगाने या आंदोलनात आरपीआयचे पदाधिकारी व कार्यकर्ते सहभागी होणार आहेत, असे उपमहापौर जगदिश गायकवाड यांनी स्पष्ट केले. यावेळी संतोष केणे, गुलाबराव वझे यांनीही बोलताना मानवी साखळी त्यांच्या विभागात जोरदार तयारी झाल्याचे सांगितले. 

       आपल्या बुलंद आवाजाने महाराष्ट्र विधीमंडळात तसेच खासदार म्हणून दिल्लीच्या सार्वभौम संसदेत शेतकऱ्यांचे, कष्टकऱ्यांचे प्रकल्पग्रस्तांचे प्रश्न त्यांनी पोटतिडकीने मांडले. मंडल आयोगाच्या अंमलबजावणीसाठी आणि त्यानंतर ओबीसी समाजात जागृती करण्यासाठी त्यांनी सारा महाराष्ट्र पिंजून काढला. संयुक्त महाराष्ट्र चळवळ, सीमा प्रश्न अशा अनेक जनलढ्यात त्यांनी हिरीरीने भाग घेऊन तुरुंगवास भोगला आहे. त्यामुळे त्यांचे हे कार्य नव्या पिढीला स्फूर्तिदायी ठरावे यासाठी त्यांच्या कर्मभूमीत त्यांची स्मृती जागरूक राहावी यासाठी नवी मुंबईत होत असलेल्या विमानतळाला त्यांचेच नाव द्यावे, अशी मागणी विविध पक्षांच्या नेत्यांनी सामाजिक संघटनांनी तसेच प्रकल्पग्रस्त शेतकऱ्यांनी केली आहे. राज्य सरकारने याचा गांभीर्याने विचार करून दि. बा. पाटील यांचेच नाव नवी मुंबईतील आंतरराष्ट्रीय विमानतळाला द्यावे, अशी मागणी या पत्रकार परिषदेत करण्यात आली.

0 63

पेट्रोल-डिझेलची जुलमी दरवाढ मागे घ्या अन्यथा भविष्यात मोठे आंदोलन करु !: नाना पटोले

इंधनावरील भरमसाठ करवाढीतून मोदी सरकारचा जनतेच्या खिशावर दरोडा.

स्वयंम पीआर एजंन्सी : ८३६९९२४६४६ – ९८२००९६५७३
मुंबई : केंद्रातील नरेंद्र मोदी सरकार पेट्रोल डिझेलवर भरमसाठ कर लादून जनतेचे खिसे कापत आहे. या अन्यायी जुलमी, अत्याचारी दरवाढीविरोधात काँग्रेस पक्षाने रस्त्यावर उतरून आज राज्यभर आंदोलनाच्या माध्यमातून विरोध केला आहे. मोदी सरकारने ही जुलमी करवसुली कमी करून जनतेला दिलासा द्यावा अन्यथा भविष्यात काँग्रेस पक्ष यापेक्षा तीव्र आंदोलन करेल, असा इशारा महाराष्ट्र प्रदेश काँग्रेस कमिटीचे अध्यक्ष नाना पटोले यांनी दिला आहे.

काँग्रेस प्रदेशाध्यक्ष नाना पटोले आणि मदत व पुनर्वसन मंत्री विजय वडेट्टीवार यांनी गडचिरोली जिल्ह्यातील वडसा येथील पेट्रोल पंपावर इंधन आणि गॅस दरवाढी विरोधातील आंदोलनात सहभाग घेतला. यावेळी प्रदेश कार्याध्यक्ष चंद्रकांत हंडोरे, आ. अभिजीत वंजारी, प्रदेश प्रवक्ते अतुल लोंढे, प्रदेश सचिव रविंद्र दरेकर, राजा तिडके, जिल्हाध्यक्ष डॉ. नामदेव उसेंडी आदी उपस्थित होते.

वडसा येथे प्रसारमाध्यमाशी बोलताना नाना पटोले म्हणाले की, कोरोनाने दीड वर्षापासून लोकांचे उत्पन्न कमी झाले आहे, उद्योग धंदे बंद आहेत, लाखो लोकांचे रोजगार गेले, कठीण परिस्थितीत लोक जगत असताना त्यात इंधन दरवाढ व महागाईने लोकांचे जगणे मुश्कील झाले आहे. युपीए सरकारच्या काळात डॉ. मनमोहनसिंह यांनी इंधनाच्या महागाईची झळ लोकांना बसू नये म्हणून दर स्थिर ठेवून जनतेला दिलासा होता परंतु मोदी सरकार मात्र आंतरराष्ट्रीय बाजारात कच्चे तेलाचे भाव कमी असतानाही भरमसाठ कररुपाने लोकांच्या खिशावर दरोडे टाकून नफेखोरी करत आहे.

राज्यव्यापी आंदोलनात ठाणे येथे प्रदेश कार्याध्यक्ष नसीम खान यांच्या नेतृत्वाखाली आंदोलन करण्यात आले, यावेळी जिल्हाध्यक्ष मनोज शिंदे, विक्रांत शिंदे, रविंद्र आंग्रे यांच्यासह अनेक पदाधिकारी उपस्थित होते. कोल्हापुरात गृहराज्यमंत्री सतेज पाटील यांच्या नेतृत्वाखाली आंदोलन करण्यात आले. पुण्यातील सर्व विधानसभा मतदार संघांमधील ३५ पेट्रोल पंपासमोर काँग्रेस कार्यकर्त्यांनी निदर्शने केली. कसबा विधानसभा मतदारसंघातील कुलकर्णी पेट्रोल पंपासमोर प्रदेश काँग्रेसचे उपाध्यक्ष आणि माजी आमदार मोहन जोशी यांच्या नेतृत्वाखाली निदर्शने करण्यात आली. चंद्रपुरात खासदार बाळू धानोरकर यांच्या नेतृत्वाखाली आंदोलन करण्यात आले. नाशिक, सांगली, अहमदनगर, नांदेड, मालवण, अमरावती, सावंतवाडी, कणकवली, बुलढाणा, नांदेड, औरंगाबाद यासह विविध ठिकाणी आंदोलन करण्यात आले.

राज्यातील एक हजार पेट्रोल पंपांवर काँग्रेस कार्यकर्त्यांनी एकाचवेळी आंदोलन करुन इंधन दरवाढीचा तीव्र निषेध केला. यावेळी मोदी सरकार जुलमी दरवाढीविरोधात घोषणाबाजी करण्यात आली.